Nan zèv atistik mwen, mwen toujou chèche rann omaj, enspire, ak rakonte istwa. Nan sans sa a, mwen te fè yon pòtrè reyalis pou rann omaj ak MIKABEN, ki gen vrè non li ki se Michael Benjamin, aprè depa trajik li nan dat ki te samdi 15 oktòb 2022.

Premye objektif mwen se te ofri l pòtrè sa a pou kokenn chenn talan li ak enpak li sou mizik ayisyèn lan. Malerezman, li fè vwèl pou peyi san chapo san li pa gen chans wè travay sa a. Jodi a, mwen ta renmen remèt pòtrè sa a bay fanmi li kòm yon jès senbolik pou temwaye respè ak admirasyon mwen pou li.

Mwen soti nan Carrefour Feuilles, e depi toutan mwen toujou vle sèvi ak atizay mwen pou ale pi lwen pase desen. Mwen fè pasyon mwen tounen yon mwayen pou ede jèn talan devlope. Mwen fòme yo pou yo menm tou kapab pote atizay la pi lwen. Pwojè sa a gen anpil valè pou mwen, e mwen reve wè yon nouvo jenerasyon atis grandi gras ak soutyen mwen e ak tout moun ki pataje vizyon sa a.

Pou mwen, travay sa a se plis pase yon desen: se yon mesaj rekonesans ak lanmou pou moun ki make lavi nou. Mwen ap kontinye sèvi ak atizay mwen pou kenbe memwa vivan, enspire, ak transmèt eritaj.

Pòtrè omaj Mikaben lan touche anpil moun ak medya, espesyalman Juno7 ki te pibliye yon atik sou sa a, kote li mete aksan sou travay presizyon mwen reyalize ak angajman mwen anvè atizay. Si w vle konnen plis, mwen envite w li atik la lè w klike sou lyen sa a.